గౌతమ్ అదానీ,Gautam Adani: అంబానీని వెనక్కి నెట్టిన అదానీ.. ఆసియా కుబేరుల్లో మళ్లీ అగ్రస్థానానికి – gautam adani overtakes ambani to asia richest person again on bloomberg index with 111 bn dollars net worth

Gautam Adani: హిండెన్‌బర్గ్ రిపోర్ట్‌తో దెబ్బతిన్న గౌతమ్ అదానీ అంతకన్నా రెట్టింపు వేగంతో దూసుకొస్తున్నారు. అదానీ గ్రూప్ కంపెనీల షేర్లు రాణిస్తున్న క్రమంలో ఆయన తిరిగి ఆసియాలోనే అత్యంత ధనవంతుడిగా నిలిచారు. ఇప్పటి వరకు అగ్రస్థానంలో కొనసాగుతున్న రిలయన్స్ ఇండస్ట్రీస్ అధినేత ముకేశ్ అంబానీని వెనక్కి నెట్టారు గౌతమ్ అదానీ. ఆసియా ధనవంతుడి స్థానాన్ని మరోసారి దక్కించుకున్నారు. ఈ మేరకు బ్లూమ్‌బెర్గ్ బిలియనీర్స్ సూచీ వెల్లడించింది.

బ్లూమ్‌బెర్గ్ బిలియనీర్స్ ఇండెక్స్ ప్రకారం 111 బిలియన్ డాలర్లతో గౌతమ్ అదానీ ప్రపంచ వ్యాప్తంగా ఉన్న సంపన్నుల జాబితాలో 11వ స్థానానికి ఎగబాకారు. అంబానీ 109 బిలియన్ డాలర్లతో 12వ స్థానంలో కొనసాగుతున్నారు. అదానీ షేర్లపై అమెరికా బ్రోకరేజీ సంస్థ జెఫరీస్ ఇటీవల సానుకూల రేటింగ్ ఇచ్చింది. దీంతో శుక్రవారం ఆయా అదానీ కంపెనీల షేర్లు 14 శాతం మేర దూసుకెళ్లాయి. కొత్తగా రూ.84,064 కోట్ల సంపద వచ్చింది. అదానీ గ్రూప్‌లోని 10 లిస్టెడ్ కంపెనీల మార్కెట్ విలువ రూ. 17.51 లక్షల కోట్లు దాటింది. వచ్చే 10 ఏళ్లలో 90 బిలియన్ డాలర్లతో వ్యాపార విస్తరణను చేపట్టనున్నట్లు ఈ గ్రూప్ ప్రకటించింది.

గౌతమ్ అదానీ 2022లోనూ ఆసియా కుబేరుడిగా అగ్రస్థానంలో నిలిచారు. అయితే, 2023 జనవరిలో హిండెన్‌బర్గ్ నివేదికతో ఆయన సంపద భారీగా పడిపోయిన సంగతి తెలిసిందే. దాని నుంచి తేరుకునేందుకు పలు రకాల దిద్దుబాటు చర్యలు చేపట్టారు. ఇన్వెస్టర్లలో భరోసా కల్పించే నిర్ణయాలు తీసుకున్నారు. వాటి ఫలితంగా కంపెనీల షేర్లు మళ్లీ పుంజుకున్నాయి. 2024లో ఇప్పటి వరకు అదానీ సంప్ద 26.8 బిలియన్ డాలర్లు ఎగబాకింది. మరోవైపు ఈ ఏడాదిలో ముకేశ్ అంబానీ సంప్ద 12.7 బిలియన్ డాలర్లు మాత్రమే పెరిగింది. 2014లో ఐదు బిలియన్ డాలర్ల సంపద ఉన్న అదానీ గత పదేళ్లలో 111 బిలియన్ డాలర్లకు చేరుకోవడం గమనార్హం. 2022 సెప్టెంబర్ నెలలో స్వల్ప కాలం పాటు ప్రపంచంలోనే రెండో అత్యంత ధనవంతుడిగానూ కొనసాగారు.